اربع بيبان

من فرط تأثرى بتجربة العم صلاح جاهين ورباعياته حاولت اعملها بأسلوب جديد ... اسلوبى الخاص

========================================
كل الحكاية فى كلمة اصلها ثابت
تمشى وتتعلم يا اما صابت يا اما خابت
ﻻ تبص يوم للناس ولو مدحت ولو عابت
وﻻ تسيب مبدأك وﻻ هدفك ولو كل الناس سابت
========================================

لو يوم محبتش اوعاك تكره وتتغير
قالوا اللى يكره يتعب ويتحير
بدل ما تنسى حبيبك وبينه تتخير
استنى لبكره واصبر عليه وبكره تتدبر
========================================

اختلاف رأيك ورأيى ﻻ يبكى وﻻ يزعل
لولا اختلافنا السكة راح تتطول
لا تسيب سكتى وﻻ تبعد عنى وﻻ ترحل
وادينى فكرتك اكيد بيها فكرتى تكمل
========================================

ﻻ تحسد غيرك فى يوم وﻻ تتمنى زوال نعمته
يمكن فى بيته كتير لو عندك صعب تتحمله
واحمد ربك على فضل ما تعرف اخره من اوله
واسعى على خير للناس واختار طريق وكمله
========================================

ناس كتير اعرفهم وياريتنى ماعرفهمش
من القلب جوة سواد وبرة ماتشوفهمش
يكرهلك الخير وفى كل الدروب واقف
وانت لو جيت تتمناله غير الخير ماتعرفش
========================================

صحيت الصبح يوم فى سريرى مش خايف
قولت دى خيبة او يمكن خسيت النص
امشى وسط الناس برضو مش عارف
اقول ده عادى وﻻ يمكن مابقيتش احس؟
========================================