نفسك تعاتب حد بتحبه على حاجه معينة؟ ... حاسس انك مش مرتاح وﻻزم تقول للحد ده كل الكلام اللى جواك
ماتفكرش لحظة وﻻ تتعب عقلك وقلبك الحكاية بسيطة جدا.

زمان كان كل الناس مؤمنة ان مافيش حاجه اسمها تعب نفسى او مرض نفسى ؛ كانوا فاكرين كل حاجه بتصيب اﻻنسان بيبقى سببها حاجه عضويه موجوده فى جسمه.
امى وانا صغير حكتلى قصة غريبة جدا عن واحد كان محبط ويائس وجربوا معاه كل العلاجات العضوية وبرضو منفعتش ؛ قالوا خلاص ناخده لواحد من الحكماء
اول حاجه الحكيم قالها له : عقلك بيقولك اعمل حاجه وقلبك بيقولك اعمل عكسها؟ .
الراجل اندهش من سؤال الحكيم وقال له دايما اللى بحبهم بعمل لهم كل حاجه كويسة ؛ قال له ده اللى قلبك بيقوله .
عقلك بقى بيقول ايه؟ قال له بيقولى مادام محدش فيهم حاسس بحبك وﻻ بيقدرك انساهم وماتحبهمش.
الحكيم قرب منه وقاله تفتكر فعلاً هو ده الحل المناسب؟
انت علاجك فى حاجه واحده بس ؛ انك تعبر عن حبك لكل حد بتحبه مش ﻻزم بالكلام ؛ بس خلى كل افعالك معاهم تقول لهم قد ايه انت بتحبهم.
قال الراجل للحكيم : طب ولو ما اخدتش منهم حب فى المقابل؟
الحكيم مسك دماغ الراجل وقال له : كل ما تحس انك ماخدتش اللى انت عاوزه ؛ امسك ورقة وقلم واكتب عتاب للى بتحبه فيها وحط الورقة فى صندوق واملى الصندوق وارميه فى البحر واتأكد ان كل ما تحبهم وتديهم وتمنع عتابك عنهم وتخليه لقلمك كل ما هما هيحبوك اكتر وعتابك ليهم هيقل.
 
:)) وانا بصراحة كنت صغير ومش فاهم كل المعانى اللى فى القصة فقلت لأمى ممكن تقوليلى كل الحاجات المفيده فى القصة فى جمله واحده

قالتلى لو يوم حد بتحبه بطل يحبك متكرهوش ؛ اكتبله رسالة عاتبه فيها واتأكد ان اللى فى قلبك هيوصله مادام احساسك حقيقى.